Námskeið um Mosfellsheiði
Félag aldraðra í Mosfellsbæ (FaMos) heldur námskeið um Mosfellsheiði í janúar og febrúar. Kennt verður á Eirhömrum á þriðjudögum kl. 17-19, í fyrsta skipti 14. janúar. Kennari er Bjarki Bjarnason, einn af höfundum Árbókar Ferðafélags Íslands 2019 sem fjallar um heiðina.
Mosfellsheiði lætur ekki mikið yfir sér við fyrstu sýn, þar er þó býsna fjölbreytt náttúra og landslag og margskonar mannvistarleifar. Þar gefur að líta seljarústir, fjöldann allan af vörðum, gamlar þjóðleiðir, fjárréttir, skotbyrgi og sæluhúsarústir.
Heiðin var fjölfarin á fyrri tíð, um hana fóru m.a. bændur í kaupstaðarferð, vermenn á leið á vertíð við Faxaflóa, fólk á leið á Alþingi á Þingvöllum og Danakonungar sem sóttu íslenska þegna sína heim við ysta haf.
Á námskeiðinu mun Bjarki fjalla um heiðina frá öllum sjónarhornum og styðjast við ljósmyndir og ritaðar heimildir í umfjöllun sinni. Næsta vor verður farið í skemmtiferð umhverfis Mosfellsheiði.
Þátttaka í námskeiðinu tilkynnist til Benedikts Steingrímssonar, netfang hans er bs@isor.is og sími 864 9409.
Þátttökugjald er 8.000 krónur.
